ULIISIKIA ILE ISHU YA MSUVA ANAYETAKA KUMFUATA SAMATTA? SOMA HAPA

Kiungo nyota wa Yanga, Simon Msuva amesema amedhamiria kwa nguvu kufuata nyayo za mshambuliaji wa TP Mazembe, Mbwana Samatta.

Nyota huyo wa Yanga amesema anataka kuondoka na kwenda kucheza soka la kulipwa nje ya Tanzania kama ilivyo kwa Samatta na baadaye apate mafanikio kimaisha.

Katika mahojiano na  mwandishi mwanzoni mwa wiki hii, Msuva amesema anataka kupata mafanikio kama yale ya Samatta au mwenzake, Thomas Ulimwengu ambao wanakipiga Mazembe.

Msuva amesema alipofikia Samatta ni sehemu ya kuonyesha kwamba kuna mabadiliko kimaisha na ndicho kitu anachokitaka ikiwa ni sehemu ya ndoto yake ya kufanikiwa kisoka na baadaye kimaisha.

mwandishi: Kipi hasa kinachokuvutia kutokana na Samatta kihatua?

Msuva: Unaweza kusema maisha yamebadilika, haishi tena kama ilivyokuwa mwanzo, kuna vitu anapata na awali hakuwa akivipata, naweza kusema tayari yuko level nyingine.

mwandishi: Maana yake unataka kwenda kucheza TP Mazembe?

Msuva: Yote hiyo ni mipango hapa duniani pia ni mipango ya Mungu. Kikubwa ninataka kutoka nje ya Tanzania na kucheza.

mwandishi:Unalenga Ulaya au hata kokote Afrika?

Msuva: Ikiwa Ulaya itakuwa vizuri, lakini ikiwa Afrika pia ni sawa. Unaona Samatta, Ulimwengu wamefanikiwa wako Afrika. Lakini kuna Mwinyi Kazimoto, yuko Qatar pia anaendelea vizuri, ninatamani sana kufika huko. Ninaamini si siku nyingi.

mwandishi:Unaposema si siku nyingi, una maanisha tayari kuna mipango imeanza kufanyika?

Msuva: Hilo linawezekana lipo, lakini si vizuri kusema sasa. Ila kikubwa kwangu namshukuru Mungu nina afya njema.

mwandishi:Nje si lelemama!

Msuva: Hata Yanga si lelemama, ninafanya mazoezi ya timu, ninafanya mazoezi ya ziada, wakati mwingine asubuhi au jioni nikiwa na timu yangu ya wana wa mtaani.

mwandishi:Kuhusiana na wewe kuanza au kukaa nje. Unajiona bora ukiingia au ukianza?

Msuva: (Kicheko), hakuna mchezaji anayependa kukaa benchi lakini hilo ni suala la mwalimu. Mimi najiandaa kwa hali yoyote, hata nikipewa dakika 20, najituma vilivyo. Sitaki niingie halafu nishindwe ili watu waseme kwamba nastahili benchi.